Milan ki khushi jitni jyada hoti hai bichadne ka gham usse kahin adhik hota hai is baat ka ehsaas mujhe pehle nahi tha, is duniya me aise bhi log hote hain jinse aap ka koi rishta nahi hote hue bhi wo apki zindagi ka ek atoot hissa hote hain. jinka jikra na hote hue bhi hame unki yaad aati hai. jab tak ham saath hote hain hamein ek doosre ke hone se hone wali khushi ka ehsaas nahi hota par jab ham door ho jate hain to wo faasla hame saath na hone ke dard ka ehsaas jaroor kara jata hai. na jane ham kitne logon se roz milte hain aur phir bichad jate hain kabhi na milne ke liye, lekin har bichude par ham udaas nahi hote, wo sare log hame yaad nahin aate.
bichadna.... kabhi na milne ke liye? ye soch kar kuch ajeeb lagta hai. wo hai ya nahi?,khush hai ya nahi?,kabhi mil payega ya nahi? aur na jaane kitne ansuljhe sawaal,na jane khud se kitni shikayatein.jab ye pata ho ke jaane wala kabhi laut kar nahi aane wala, wo hamesha ke liye ja raha hai. ab use kabhi sun pana,dekh pana sambhav nahi hoga hame achanak uski jaroorat mehsoos hone lagti hai.ham use jaane nahi dena chahte rok lena chahte hain.
lekin tab kya karein jab koi bin bataye hi chala jaye aur kabhi laut kar na aye, apke bare me soche bina ya shayad use iska mauka hi na mila ho ke wo ruk sake shayad jaana uski marzi na ho shayad wo waqt aur haalat se majboor ho, shayad wo bhi aapki taqleef me barabar sharik ho raha ho, ya phir shayad wo khush ho use apke dard ka ehsaas hi na ho........
kya use pukaarna uchit hai jo kabhi nahi lautega,kya usse koi umeed karna khud to chalne jaisa nahi jo mud kar nahi dekhne wala?? kyun phir bhi ham aisa karte hain , uske liye kyun pal pal tadpte hain jo hame kabhi na khatam hone wala intezaar aur umra bhar ki judaai de gaya shayad jaan boojh kar shayad anjaane me,par milne ki manzil judaai hai kyunki kisi ka saath hamesha ka nahi hota wo bahut kam aur khushnaseeb log hote hain jo hamesha saath hote hain. par saath rehne ke baad jo akela chod jaate hain wo na bewafa hote hain na kassorwar phir bhi ek saza de jaate hain, judai ki saza,intezaar bhi na kar pane ki saza,bichadne ki saza.
Is sachchai se waakif hote hue bhi ham roz naye logon se milte hain ke wo ek din humse bichad jayenge kyunki shayad yehi parinati hai. maut ke dar se ham saana lena nahi chhodte to bichadne ke dar se milna kaise chhod sakte hain.
4 comments:
hmmm..
gahri samvednaayein prakat kar rahi aapki ye post.achhe lekhak adhiktar kisi na kisi gam ke shikaar hote hain aur unka gam hi unki prerna ban jata hai..aisa hi kuch aapki post se jaan padta hai..
sirf itna hi puchunga AMI aapse ye sab padte hue meri aankh se aasu kyo nikal rahe hai?
hiiii....Ami
sirf itna hi puchunga aapse, ye sab padker meri aankh se aasu kyon nikal rahe hain?......Tariq
Hii Ami!!!
Apne jeevan ki wo sachchai zahir ki hai jo hum sab jante hein lekin shayad chah kar bhi us sachchai ka saamna nahi karna chahte hein. Aur agar hum aisa kar lein to hamari zindagi se gam dur na ho jaye..........shayad isi ka naam zindagi hai.
Post a Comment